長假在即，贈你4點安全性交Tips

就快到新年長假，又係大家出動既時候，去Party隊酒啪野又好，三五成群玩Group又好，又或者只係同愛人錫錫都好，阿守長氣都要同大家講句，玩都要玩得小心Ｄ，奶野（HIV）就一世架啦！點小心Ｄ？記住呢四個Point：戴套、唔毒、唔酒、定期檢查。


一、戴套：千祈唔好ＢＢ，玩親「出出入入」都一定要戴套，依家好多套都好薄，又有潤滑，麻煩少少，安全一世。

二、唔毒：吸毒當然對身體唔好，不過最大問題係吸毒之後，個腦會Fing Fing下，唔知自己做乜，搞野個陣就唔識戴套架啦！

三、唔酒：原理同上，「貓」左之後，仲識撕開Condom個包裝咩？而且玩到醉醉地，畀人溶左都唔知咩事丫！

四、定期檢查：就係定期去Check HIV！重點係「定期」兩個字，阿守以前喪玩個陣，就兩個月一次，吉一下手指，等十五分鐘就得！

唔肯去Check HIV其實係怕瘀

阿守知道，大部份人都唔想定期去檢查，「要特登走去Check、怕麻煩」其實只係藉口！

事實就係怕瘀皮！

如果一個唔該驗到奶野（HIV），仆街！即時覺得同你Check果職員好似帶個有色眼鏡望住你咁，然後好似會通晒天咁！好似覺得人人都會歧視你，好似成個世界都變晒咁，好似覺得自己就快死。

阿守知道呢個感覺會好難受，會令人想逃避、逃避再逃避。

早排，阿守有個Member朋友，好疏個隻，就係因為Check到奶野（HIV）而覺得生無可戀，就咁係屋企自殺死左。

唔通，你真係想咁？

你可能長命過正常人

世界上大把HIV帶菌者都活得好好的，好似正常人咁同人行街、同人食飯、同人睇戲、同人旅行，你唔講，根本冇人會知你係HIV，唔會有人睇得出架！

更何況，在香港現有的醫療制度下，由醫生度拎HIV藥去延長生命幾乎係免費，如果你將自己個身體保養得好地地，定時睇醫生、食藥、做運動、食得健康，要生存多十幾二十年真係冇問題，真係隨時長命過Ｄ正常人丫！

阿守相信大家心底裡應該有好多野想做，買第一架車、去日本睇櫻花、睇雲翔拍唔知第幾套同志電影、甚至拍拖，明明可以生活好精彩，點解要放棄自己？

性生活檢點少少就得啦

至於性生活方面，以阿守既知識，體液（精液）同血液既HIV濃度最高，只要圍住呢兩點注意少少就好！

一）自己手淫打飛機當然冇問題；
二）人地幫你打飛機當然都冇問題，請確定自己下面同對方既手冇傷口；
三）KISS咀咀只有極低機率，約一公升口水先會奶野；
四）至於1069囉～戴套係鐵則，只要個套冇穿冇爛，同埋HIV個指數要好低，咁應該都冇咩問題，不過可免則免。

咁多限制？又話好似正常人既？

喂！呢Ｄ野，要還架！

奶左野（HIV），想生存，唔通仲諗住可以過返以前荒唐既性生活？唔該，你應該要趁呢個機會，重新做人！你仲有愛人、屋企人、朋友架嘛！！你仲想見多Ｄ佢地幾面，係咪？

因此，回到原點，大家出黎玩，就要記住：戴套、唔毒、唔酒、同埋定期檢查囉！

邊度檢查？去關懷愛滋啦！（http://www.aidsconcern.org.hk/）