今年亞洲先生質素好似幾好...

亞洲先生晒手瓜 淺水灣拉票

16位亞洲先生入圍參賽者今日喺淺水灣泳灘，向市民落力拉票，呼籲大家投票，票數最多者則可奪得「觀眾眼中的冠軍」。


雖然泳灘有好多外籍人士，16位亞洲先生依然表現落力，其中來自廣東嘅6號鍾劍輝，以及來自馬來西亞嘅15號黃胤頂，佢哋以以英語向外籍女士拉票。

黃胤頂呢位「大隻男」，雖然只係21歲，但佢擁有16吋嘅手瓜、44吋胸，佢話：「好鍾意打籃球，每星期會健身6日。」有冇信心贏？佢話：「我會做好自己，16個都好好，唔會去比較。」身型咁好，難怪佢上年喺馬來西亞已經贏得國際先生第一名啦！

至於貌似吳彥祖嘅鍾劍輝，佢話好感謝大家將佢同對方比較。靚仔會優勝啲﹖佢話：「唔算，16位選手都各有特色，我覺得比較親切，和藹可親，同大家好容易相處。」