[蘋果日報] 黃耀明勇敢出櫃「我係基佬」

黃耀明出櫃了！即將 50歲的明哥活躍樂壇 20多年，從未隱瞞其性向，但也從未承認同性戀者身份，明哥前晚在紅館舞台上勇敢踏出一步，對住過萬觀眾發表同志宣言：「我係一個同性戀者，我係一個基佬，我係鍾意男人。」明哥當真光明磊落。

今年 6月踏入 50歲的黃耀明出道至今從未隱瞞性向，其歌曲一直充斥着同性戀意識，加上不時被拍到與外籍同性密友約會，同志身份十分明顯，不過明哥卻從未認自己是同性戀。

近日明哥和劉以達為慶祝達明一派組成 25周年，在紅館舉行一連四場「達明一派兜兜轉轉演演唱唱會」，前晚尾場演出，明哥的外籍同性密友亦在場。

「我係鍾意男人」

前晚明哥穿上黑色禮服及陽具帽獻唱充滿同志色彩的《禁色》，當演繹完畢後，明哥除掉帽子，說出心底話：「第一晚完咗演唱會後有人問我係唔係同志，由 88年我借陳少琪支筆寫咗《禁色》， 89年借周耀輝支筆寫《忘記他是她》，我從來冇隱瞞過我身份，不過既然大家咁想知，我想一次同大家講，我唔係同志，但係同性戀者，我係一個基佬，希望其他同性戀人、其他基佬，佢哋唔需要好似《禁色》入面嘅歌詞咁『讓我就此消失這晚風雨內，可再生在某夢幻年代』。」

明哥前晚出櫃，在舞台上公開承認同性戀身份，他更以基佬來形容自己，基佬一般人都會覺得帶有貶意，但明哥卻在個唱中多次以基佬形容自己，可見他以基佬自豪，他說：「依家係 21世紀，唔需要夢想有日去愛一個人需要你去批准，唔需要大家再猜，你係同志定唔係同志，我係一個同性戀者，我係 gay、基佬，我係鍾意男人，唔好意思傳媒我會掃你哋興，我跟住會再唱 25年歌，以後唔好再問我呢個話題。」

前晚緊接明哥出場的劉以達，大讚明哥出櫃宣言十分感動，他抵死說：「其實我都好愛明哥。」達明介紹來自內地的樂手時，明哥亦無懼敏感話題指着對方說：「你就係我哋所講嘅蝗蟲，我哋係走狗，不過唔緊要，走狗同蝗蟲可以做朋友。」

暫未計劃結婚

完騷後，達明出席慶功宴，對於終於說出性向是否令他如釋重負，明哥說：「我係乜人大家都知，喺內地唔會唔講，內地好多人都係呢啲人，唔講得唔睇得，個國家會退步得好緊要。」問明哥是否也有結婚計劃？

他說：「暫時唔會，香港冇，但外國可以，不過可以喺香港爭取權益，講咗咁多年，社會都係用有色眼鏡去睇，年輕一代唔敢講畀家人知，仍偷偷摸摸，香港價值觀越來越窄，好恐怖。」

採訪：王連連
攝影：仇志德