[蘋果日報] 無悔失去一切 只想做「真女人」 忘記她是他

天生男兒身，到了廿來歲，忽然喚醒軀殼內的女兒心。「她」易服變性，結果失去工作、失去朋友，更被家人趕走；沒有慈善收容中心願意收留她，一度淪落至穿着短裙露宿街頭。已排期9月做變性手術的她，流淚訴說自己的故事，希望換取大眾的理解和包容。記者：梁御和


現年廿多歲、已易名 Angel的她，四年前突然開始留意女裝服飾，買了一套回家試穿，「買咗一條黑色碎花裙同灰色吊帶上衫，一着上身就覺得原來女裝先適合我，感覺好靚好合身」。

自此不時獨自在家穿女裝。

兩年前，任職髮型屋學徒的她，一日鼓起勇氣，穿起黑色百褶裙、白色長靴、白色上衣及粉紅色運動型外套，毅然上班去。

老闆把她從頭望落腳、再從腳望上頭說：「你想點呀？」禁止她再以女裝示人。

家人割席　露宿公園

Angel當時已在服食荷爾蒙，她改穿鬆身衫褲上班，遮掩微隆胸部。一個月後，有商場保安投訴 Angel使用女廁。「老闆叫我無限期放無薪假。我問佢點解，幾時可以返番工，佢答我唔知，即係炒咗我啦」。

其後她搵工無數，皆遭白眼，「髮型屋、 Sales、文書工作唔請，要唔要見客嘅都唔請。

總之就算見工過程幾好，但只要佢哋見到我張身份證係男仔，但外貌係女仔，態度就會180度轉變」。原來的朋友也紛紛離她而去。

更傷的是家人背棄。「你要變性就唔好留喺屋企！」母親與她割席的一幕，歷歷在目。「我喺屋企成日都會着女裝，媽媽同妹妹都知道。

嗰晚我同佢哋講想變性，大家情緒就變得激動，最後我答應執嘢走」。父親在她兒時就走了，家裏只有媽媽和妹妹。

背着一個小背囊， Angel漫無目的在街上遊蕩，晚上瑟縮在聯和墟小公園的長椅上。「全身得個背囊、一條短裙、一件上衣同埋幾十蚊，後來仲連袋帶衫俾人偷埋，得番着喺身嗰套衫」。

每天她到公廁冲凉洗衫後，盡量把衣服擰乾，濕漉漉的又再穿上身，在公園閒逛吹乾後才躺下睡覺，轉頭又熱得汗流浹背。

夏天夜裏，蚊蟲咬得全身腫痛，穿女裝短裙的她又怕受欺凌，曲身躺在又窄又硬的公園長椅上，根本無法入睡。餓了，她就到後巷執紙皮變賣，好買麵包。

排期9月做變性手術

露宿了整整一個月。她不斷向社福機構求助，「當時手提電話都冇，不斷去酒樓借電話打去各個收容中心，冇一間可以收留我。男嘅收容中心話唔收留女性，女嘅收容中心又話唔收留男嘅，好無助」。

後來聯絡到同志團體香港彩虹，獲借出辦公室讓她暫住，更協助她申請綜援和單人公屋，近期終正式上樓。

離家兩年，她有勇氣站出來講「出櫃」故事，卻沒膽量聯絡媽媽和妹妹。遠望老家窗戶，她紅着眼說：「我只係想同媽咪一齊食飯，一齊坐喺沙發睇電視。」

Angel已排期本年9月進行變性手術，「我打算做完手術，再返屋企搵媽咪，到時佢冇得再阻止我，可以接受我」。

成年人忽然轉「性」屬罕見

精神科醫生黃以謙指出，大部份變性人從小就會覺得自己應屬另一性別，「係身體錯配咗」；到長大後才發現的情況，比較罕見，有可能是小時候知道這想法與朋輩及家人期望不同，心理上自行壓抑了。

團體倡設中性廁所

要在公立醫院進行變性手術，必須先通過一年半至兩年精神評估，確定當事人的換性需要及慾望，並以另一性別生活一段時間，看是否適應，以免將來後悔或出現精神或情緒困擾。

協助 Angel的香港彩虹幹事 Jimmy指，正等候做變性手術、或經醫生診斷為「性別認同障礙」人士，只要手持醫生紙，就可進入女廁，警方一般不會拘控。

他提倡設立「性別友善廁所」（ Unisex Toilet），不限男女使用。「好多男變女嘅跨性別人士出外如廁時都好麻煩。入男廁固然尷尬，入女廁又驚被其他人誤會。」外國如澳洲，中性廁所佔了七成以上，但在港僅機場、小型餐廳有此設施。





阿守話：


Angel因為坦白，而被家人趕了出來，仲搵唔到工，其實真係幾慘，佢又唔係咩大奸大惡，香港真係倒退了！雖然阿守覺得佢幾可憐，但對呢類人只可以做普通朋友囉！


阿守識得個朋友，日頭都有一份好 Man 又話得事既工，原來佢夜晚同人開Ｐ時，會反串做女人，著晒絲襪高根鞋被人淫慾。見到佢玩到好High，四圍Ｄ人都會同佢又攬又跳，阿守都覺得佢好代入女人的角色，只係，阿守真係絕少見佢同人開波！


原因，好簡單！


搞基咪搞基囉，扮乜鬼女人？你估有幾多個男人要你地？直的男人只會要真女人，基佬更只會要男人。扮晒成個女人咁，邊個要你？搵食一定好艱難！


泰國有好多變性人，見到佢地鬼火咁靚，比女人更女人，都為他們開心。可是，男人變性後，永遠不會再有性興奮，因為做手術時會把ＪＪ附近的所有神經線都切除，再植入假陰道，為了只是滿足另一方，值得嗎？

最後，要讚的是這報導是近期同志新聞寫得最好，最Touching的，畀個讚你。