交友APP有感（一）你有苦衷 我都有付出架！

好多時，打開JackD定係Grindr，一版版滿滿的男人相，有正港肌肉男、又有高瘦平、有靚仔型人、也有肉酸核突怪，得閒睇佢地個樣，留意下佢地資料，有時都可以消磨時間。不過，交友APP入面最多既，反而係一Ｄ擺張風景相、寵物相、身材相、甚至黑色一片既，阿守對呢類人真係冇乜好感。

事緣係，阿守本人既交友APP係寫明「無臉照一律不回覆」，不過唔知點解，呢Ｄ「無臉者」都會係咁Send Message過來，好簡單求其咁問「Fun？」、「1/0」、「More Pic？」。

起初，阿守都會Send返句，問佢地有冇相睇睇，而佢地只會答「唔方便」、「工作關係唔方便」、「我怕畀人知」等等藉口而拒絕露臉，不過同一時間又不停咁問阿守Ｄ私人野，又要約阿守出黎玩等等。

大佬丫，想傾計搵Sex識朋友，至少都要有些少誠意啦！

你有你苦衷，阿守我都有付出架！

你估剩係得你怕？所有露臉既同志，心底裡都怕畀家人同朋友知道，今時今日既香港地仲有唔少人會指住Ｄ基佬黎笑，甚至會影響工作、家人關係，你估真係唔介意架咩？

不過，如果你想要某一樣野，自然就要犧牲另一Ｄ野架啦！

你Honry個陣想搵人開波、Boring個陣想識朋友、Lonely個陣想搵老公，你唔畀相人地睇，人地又點去認識你呢？剩係識得問人野，又唔畀人問，咁點樣開始呢？

There's no such thing as a free lunch.（世界上沒有免費午餐）

咁怕死就唔好識人啦！唔好咁自私好唔好？

有Ｄ人就醒目少少，佢地會Chat入面直接Send臉照畀阿守睇，又或者Unlock放係Private Photo既臉照，呢Ｄ都係一個比較令人條氣順Ｄ既方法，保住你尊貴既臉容之餘，仲可以打開溝通之門。

大家一人一步，世界更美好。