[蘋果日報] 九龍塘港男谷肌變山寨A＆F

早排A&F肌男大軍殺到香港，100排人肉朱古力搞到成班港女發晒癲，排住隊去中環朝聖仔，估唔到前日港版A&F就喺九龍塘出現，不過就鬼影都冇隻圍觀，原來佢哋喺度幫無綫收費台拍嘢，包括有下個月就做羅樂林女婿嘅港男陳志健（Otto）、白健恩、「翻版王貽興」李偉健同功夫新星阿銘。

雄風乍現

四個麻甩佬喺條街度剝晒衫，着住紅短褲踢拖，明玩山寨版A&F，紋身男Otto搽完太陽油又狂噴水，仲特登行埋去女工作人員面前擺chok甫，下個月就娶羅苡之嘅佢，都唔識避忌吓，完全唔怕未來老婆呷醋。

至於功夫新星阿銘就最識搶鏡，佢嗰排腹肌同胸肌唔止夠晒澎湃，連紅褲仔下嘅雄風都凸出過人，佢仲爬埋上有成六、七呎高嘅石壆擺甫士，其他港男惟有甘拜下風啦。

阿守話：天時暑熱，真係好多地方都有「正菜」剝衫騷肌，波地、沙灘最多，就連Ｄ搬運工人都唔差，成身肌肉任睇唔嬲！Man 到震！當中李偉健最岩心水，對波又大又挺，朱古力腹肌又明顯，又高大又有男人味，一除衫就將其他三個比下去！