[蘋果日報] 肌男汰弱 肉女留強

這邊猛男手瓜起展、胸膛寬闊；那邊美女小腹平滑、手臂結實……現代人視體型管理為終身事業，健身男女訴說肌肉背後要節食操練，原因只是簡單的一句：「因為我鍾意！」

健美型男范家裕

 「我係做消防員嘅范家裕，今年34歲，細個時好瘦弱，畀人叫潺仔，到中學第一次去健身室玩，越練越大隻，上咗癮就玩落去。健身令我變得專注同有鬥志，對消防員工作好有幫助，拎重型工具都可以靈活自如去救火救人。

肌肉型大隻佬係咪得人鍾意就一半半，曾經試過當面畀女仔話我似綠色巨人，又有女仔同男朋友講：『你咪練到咁大隻呀，練到咁大隻我唔要你㗎！』我冇唔開心，因為操fit係為自己鍾意，唔係取悅人哋。

我結咗婚有兩個仔，太太唔想我玩比賽，因為太專注會忽略咗屋企，但每次完成好有滿足感，所以仍然會參加。

我2001年開始參加全港健美錦標賽，拎過五屆冠軍、三屆亞軍同兩屆季軍，上年仲代表香港去美國參加阿諾舒華辛力加（Arnold Schwarzenegger）主辦嘅健身賽，全球22個選手中排第9，都好滿意。我喺場內遇到阿諾，佢60幾歲仲好fit，我有信心到咁嘅年紀都可以keep到咁嘅身型。

健體美女Josephine

「我係Josephine楊嘉燕，今年21歲，由細到大都好活躍，因為跌傷腳唔可以打籃球，於是開始玩健身。讀完毅進課程後就做健身教練，呢份工需要好多體力，30歲左右就要諗後路，例如轉做私人授課或者轉工，但暫時仲好鍾意做。

女仔嘅體質要練肌肉都唔係咁容易，但玩健身確係容易吸引異性，因為好少會見到女仔玩啞鈴同器械，女仔好艱苦、好專注咁做運動，會令男士覺得好吸引。

我參加過兩屆『健體小姐』比賽，兩次都得季軍，喺台上有四個自選動作，女仔唔係鬥大隻，而係睇整體係咪均勻，要練得靚係好難。比賽最難之處係有三個月要減磅戒口，要有一份堅持先可以做到。



Josephine修身小貼士：

1.不應胡亂節食，要計算每日所需卡路里
2.健身先定目標，再擬定訓練計劃
3.年長女士若首次健身，最好有教練指導，免方法錯誤弄

范家裕健身小貼士：

1.注意飲食，少吃高脂食品
2.留意體重會否過輕或過重
3.充足睡眠應付鍛練