圍基告密（八）Gemini 跪低真相

最近收到讀者來信，爆了一單舊聞，不過甚有話題性，內容好詳細，只係未知真假，信則有，不信可以當笑話一件。


Member 的 Sauna 生意話易唔易，話難唔難，如果做到好似 Double 或者 ABC 集團，針對市場而搞的 Raindow 和銀河，其實已經算相當成功，不過 2010 年開張的 Gemini 就認真失敗，由 2010 年 1 月開張到 5 月無聲無息摺埋，把當初總數 60 多萬股東資本，不用半年就完全蒸發掉，原來問題只出於搞手一個人身上。



因爛玩而搞 Sauna

2009 年，Party 和早場節目興起，很多 Member 晚晚都去蒲天光。其時這篇文的主角：Ｋ君經常出去玩，識到不少人，覺得去人家地方玩有時唔太方便，因此就想到開 Sauna，有自己地方玩之餘又可以賺錢。

相識天下的Ｋ君，很快地找來十多人一起集資，預計每人夾幾萬蚊，想搞得有聲有色。事實上，每人幾萬蚊對這班人來說，並不是很大的數目，而且可以做唔洗做野，Ｋ君自願代勞，因此都很樂意夾錢。

有了這一大筆錢，Ｋ君就開始物色舖位，最後給他找到位置介乎銅鑼灣和灣仔之間的海聯大廈。雖然這大廈位置遠離地鐵站出口，算是兩頭唔到岸，但七樓可以打通兩個單位，面積大又有海景，附近又有 Gay Bar，所以Ｋ君也拍板於此發展。

打造全港最大間 Sauna

雄心壯志的Ｋ君，索性把此事大搞特搞，於是找上那時名氣較好的Ｐ字頭的同志骨場老細Ｊ君，游說他齊齊打造「全港最大間 Sauna 和 Spa」，令 Member 可以在按摩後去 Sauna 玩，或玩完之後就去按摩休息。

由於Ｋ君口甜舌滑，再加上Ｊ君貪婪心起，所以一拍即合，Ｊ君更把位於尖沙咀的分店賣出套現，再把位於銅鑼灣原址的京都商業中心 12 樓搬到海聯五樓，實行上下兩層「孖住上」。

炒熱起來的氣氛令人盲目，一位股東在事後透露：「去得 Sauna 玩的人，並不會去按摩，同理，去按摩的人也不會去 Sauna 玩，因為兩批客消費目的不同，本身更加係兩類人，根本就不會出現互助互利的關係。」

Ｋ君恃著自己曾花過不少時間去觀察 Sauna 場的運作模式，也曾搞過一間仍然現存的Ｔ字頭同志骨場，因此向眾股東拍晒心口說不用擔心，每個月只是等收錢。

在他的計劃書中，他會在大陸買一個價值十多萬的超大按摩池，放在一個超大浴室，浴室內有落地玻璃窗，在浸池時飽覽維港景色，再者乾濕蒸房樣樣有齊，大廳也裝有一部高清電視，可以睇高清電視和四仔，另外更設有可以摺得埋既膠板，平時會間出八個黑房，搞早場時可以把膠板掉埋一邊，變做千尺空位，總面積可容納上百人以上，因此 Locker 也弄了一百個。

另外，更花錢買專業電腦軟件紀錄人流和收支，所有支出連流動資金，預計六十多萬。股東們聽後都覺得沒問題，就拍板上馬，準備 2010 年 1 月 15 日正式開張。


開張前問題多多

在這個完美 Sauna 開張前一星期，一切準備就緒的時候，有幾個股東突然指出場內的裝修很有問題，例如按摩池水沒有任何循環消毒設施，水也不夠熱；沖涼花晒水力太低，水並不是噴灑出來而是流出來；冷氣機開啟時，熱水爐一開就跳掣；黑房沒有ＫＹ和避孕套，迷宮沒有四仔細電視，就連黑房間隔用的膠板也沒作固定，搖搖欲墜，搞緊野既時間隨時林晒；還有乾蒸房滿佈高壓電線，分分鐘電死人；駐場電腦太舊款，上網也很慢，總之正常 Sauna 沒有的問題都全部出現。

股東們也就此向Ｋ君反映，Ｋ君就向大家狂派定心丸，說會找熟人來大修，不過股東們仍不放心，自行找了幾個相熟的機電工朋友上來檢查，檢查後發現原來整個場的水電結構完全不合格，必需重新整過，而且價錢至少要十萬。

事情揭發之後，沒有股東肯承包這額外的「重整費用」，Ｋ君這時就站出來說這些都不是問題，很快會解決，然後就找來他自己的熟人商量，想出一些折衷的方法，如水力不猛就把六個花晒減至三個，限制按摩池開啟時間，下午人多前才注入熱水，減輕熱水爐的負擔，必要時甚至停開冷氣機，這樣就不怕跳掣，而乾蒸房更索性全面封閉。

終於到了正式開張日子，問題仍然存在，全場繼續跳掣停電，三個花晒更沒辦法容納到客人，封閉的乾蒸房更令客人無癮，毫無衛生可言的按摩池開放時，看不到海景，因為玻璃窗滿佈水蒸氣，有等於無，場內沒開冷氣更是趕客。

這時有股東實在忍不了，提議叫停整間 Sauna，因為如果不重新大修是無法做生意，其他股東也覺得這個「全港最大間 Sauna」實在是令他們非常丟臉，終於爆發出來，決定召開股東大會，要求Ｋ君交代一切。


圍插大會　Sugar Daddy 力撐

會中，眾人都表示現在這個場的裝修，完全不值六十多萬，如果再包十多萬元重新維修費，即共八十萬元，已超出各股東的預算，要求Ｋ君負責承擔那多出來的「重整費用」。

這時，有一個股東、也是Ｋ君的 Sugar Daddy 開口力撐：「Ｋ君佢搞呢間 Sauna 真係盡心盡力，一個人唔可以兼顧咁多野，你地都要體諒下佢，呢個時候大家應該一齊諗有咩辦法解決先。」

可惜一眾股東仍然不為所動：「我地一直都有提佢，只不過佢只係識講『呢個唔係問題，遲Ｄ會冇問題』，依家搞成咁，唔通要我地去負責？」

事實擺在眼前，Ｋ君當場也沒話好說，Sugar Daddy 最後唯有打完場，「咁啦，總之你地夾幾多錢，我全部都包起佢！希望大家唔好再為難Ｋ君了！」

事實上，大家開大會做咁大場龍鳳，都係等緊有人認頭，Sugar Daddy 咁講當然人人舉腳贊同。總共六十幾萬，即場埋單計數開支票，有人幫手代還錢，Ｋ君真係死好命。

「股東有十幾人，大家每人都係拎幾皮野出黎玩，就算蝕錢都冇所謂，只不過大家唔妥Ｋ君呢個人，先做呢個聲討大會。」其中一個股東提起都火起。

事後，有股東曾經查過按摩池的型號，發現原來唔洗三萬蚊，而高清電視也只是標清格式，即是說，Ｋ君至少吞了十幾萬，再加上 Sugar Daddy 幫他包起六十幾萬，即係原來Ｋ君一毫子都冇出過，分分鐘仲賺返轉頭！


想自己搞起佢

其實件事仲未完，當阻手阻腳的股東走晒之後，Ｋ君見個場其實仲勉強運作到，就同 Sugar Daddy 講不如果自己搞起佢啦，首先佢就搵 P 字頭按摩店老細Ｊ君幫手做營運，五千蚊一個月，負責場內一切瑣碎事，包括請人和裝修等，而自己就主力谷宣傳。

不過自己話係力谷，卻原來都只係諗 Nude Day 主題、SMS Coupon呢Ｄ普通到小學生都諗到既優惠，連最基本去 gayhk.com 做廣告拉客都冇。

過了兩個月，每日客量都係單位數字，生意情況同植物人冇乜分別，日日都係蝕錢。見到呢個情況，Suagr Daddy 就勸Ｋ君收手唔好再搞啦，去到呢個地步，咁先 Close File。


退租毒招現形

在Ｋ君打退堂鼓前，原來曾經搵過 Double 老細來睇舖，諗住叫佢頂手轉讓，賺最後一筆錢，不過由於呢個場個名已經臭晒，裝修又唔得，位置又差，真係睬佢都有味，所以都係拒絕佢。

到正式退租前幾日，Ｋ君覺得業主有可能會將這個場轉租給其他行家，再起一壇新的 Sauna 場，為免益其他人，他就帶齊「架生」，返去卜爛晒入面的按摩池和冷氣機，損人不利己，相當陰毒。

事後業主看到凌亂不堪的單位，既要花錢把按摩池的碎片和垃圾移走，又要搞過晒Ｄ水電，都顯得非常無奈。

後來想向Ｋ君追討，卻找了幾個月都沒有消息，好像人間蒸發般，當業主去五樓的Ｐ字頭骨場查詢時，也因Ｊ君扮唔係公司而得不到任何回覆，兩個人完全不負責任。業主真係欲哭無淚。

另外，由於Ｋ君的急流湧退，所以 Sauna 最後日子的所有支出，完全沒人負責，包括人工，有幾位前職員也訴怨：「Ｋ君和Ｊ君兩個都玩潛水，真係俾我認清佢地係咩人！」

話說回來，Ｊ君也是此事中「半受害者」，先是被Ｋ君成功游說搬到偏遠地方開舖，人煙稀少，入夜之後大廈仲要登記訪客，尷尬到爆，然後旗下紅牌師傅又走得就走，得返五個全職同埋幾個 Part-Time 撐場，再加上內褲生意又半癱瘓，連鎖反應下，搞到業績一落千丈，不比從前。

想搬返去原址都冇可能（俾其他美容公司租了），捱了年幾之後，終於搵到登龍街有位搬，只係大舖變細舖，真係陰公。諗深一層，其實真係貪心累事。

至此，「全港最大間 Sauna 和 Spa」的傳說，經過半年之後終於劃上句號。