圍基告密（五）靚仔墮落記

聽班姨媽姑姐講，佢地圍內有個 Friend，暫且叫 H 君，後生大隻又靚仔，日頭有份萬零蚊一個月的寫字樓工，都叫收入穩定。

誤交損友變「驚慌鳥」

點知半年前 H 君有次去 Home Party 誤交損友，有朋友在開波砌之前拎一粒糖畀 H 君食，話會好正好持久，H 君為免掃興，一時心軟下就食左粒糖玩，點知又真係可以玩得比平時癲好多，從此就玩上癮，玩之前都會食一粒，唔知頭唔知路的 H 君男友仲讚佢勁左好多。

點知 H 君愈食愈上癒，最近仲學埋溜冰，前幾日姨媽姑姐係尖沙咀街頭撞到佢，發現佢變化好大，皮黃骨瘦，臉容枯萎，同姨媽姑姐寒暄時，仲成日「傻強」上身，覺得有差人跟緊佢咁。

傾計時仲覺得佢語無倫次，例如 H 君同姨媽姑姐講：「呢排好搵啦，早幾日見你又有新車喎！」事實上姨媽姑姐連車牌都無。

姨媽姑姐話自己冇車，佢就打蛇隨棍上話：「咁你去邊丫，會唔會飛的？我約左人係中環等，一齊丫。」當時姨媽姑姐已經話自己唔會去中環，點知 H 君就死纏爛打跟住成條街，實在係好奇怪。

冇人敢埋身　隨時斷六親

事後再聽朋友講，原來 H 君當時已經食上癮，食到日頭份糧已經支撐唔到佢買毒的錢，要去到幫人走貨撲水的地步。

原來 H 君真係食到出賣朋友。

H 君唔夠膽自己一個走貨，賤格到搵身邊「朋友」壯膽，如果的士被交警截查，就真係水洗都唔清，累街坊死仆街咪係呢Ｄ人囉！

後來 H 君更向男朋友度水，男友累勸不成就分手收場， H 君到最後更因為食到癲癲傻傻，連日頭份工都冇埋，依家更係失去聯絡，不知所蹤。

阿守奉勸大家，如果身邊有朋友係有吸毒習慣，又發現佢行為開始有Ｄ失控，就真係要小心Ｄ，唔好行近咁多，分分鐘佢身上有包粉，畀警察周到就麻Ｑ煩！

吸毒，千祈唔好制。