圍基告密（六）用家變拆家 慘淡收場

阿守曾經認識一個毒品用家 F 君，當年尚是一個廿幾歲小伙子，每次去 Party 玩都會食。後來上晒癒，愈食愈多，錢亦燒得愈多，某一天，突然醒覺「冇理由畀錢人賺」，於是乎就開始當起拆家起來。

高質素生意

當拆家，首先就要識搵窿路入貨，F 君做用家好耐，同好多拆家都熟，大概就知道點向上線拎貨。

幾年前有睇新聞，那時販賣毒品的人為減低成本，唔多唔少都溝其他雜質，好似混入玻璃或必利痛磨成的粉，甚至直接溝石灰粉，所以先會成日出現食死人的新聞，相反，F 君賣貨就講到明不含任何雜質，因此吸引到不少想安安全全玩的客仔！

後來他更夥拍朋友 J 君夾份租了個單位用來擺貨，方便拎去 Sauna 等夜場，仲成為當時 Member 界幾個大拆家之一。

錯信朋友　身敗名裂

點知，J 君貪方便，成日將條鎖匙畀個客 Keep 住，叫佢自己上去拎貨；J 君甚至會叫鴨仔上去個單位，一邊 Take 野一邊玩。冇幾耐，呢個單位好快就揚晒出黎，反毒組知道有竇仲唔踢咩，搜集晒證據之後，某一晚就拉晒所有人，一鋪清袋。

後來睇返，J 君就係自食自果，而 F 君都幾無辜，阿守認識佢係一個極小心既人，從來唔會帶客上去個單位，因為佢話呢Ｄ野愈少人知愈好，點知就信錯一個 Take 壞腦的 Partner，搞到身敗名裂。

所以話，千祈唔好掂毒品，亦都要遠離 Take 壞腦的人。