《12金鴨》有感（含劇透）

終於睇完吳君如套《12金鴨》賀歲片，基本上係金乜系列最爛既一部，係有少少失望，主線薄弱、支線太碎、主角們（出場最多那幾個）外表不討好，而且冇中心主旨，完全冇《金雞》系列那種盪氣迴腸的感覺，不過，阿守覺得成套戲最搶既支線，係飾演已婚同性戀的謝檸檬同吳君如呢條線，冇醜化同性戀之餘，仲要幾Touching！

估唔到由靚仔謝檸檬扮基佬

係戲入面既後半段，講謝檸檬自少就暗戀吳君如，由於種種原因，可能係怕醜、可能係怕畀人笑，所以謝檸檬只可以離遠咁偷拍吳君如，有次吳君如一時貪玩鍚左謝檸檬一啖，令謝檸檬對吳君如愛得更深，然後，本身是有錢家庭的謝檸檬，成年後奉父母之命跟另一個有錢女人結婚，呢場政治婚姻當然令謝檸檬好唔開心，之後佢搵返吳君如出黎表白，而且係黑房入面「依泣」那一幕仲好鬼感人。短短幾分鐘，成功咁表達出「想愛而不能愛」的感覺，算係成套戲唯一既感情位！

好無奈，卻非常貼近現實。

阿守識得唔少出黎玩既Member，原來係婚又結埋、仔又生埋，佢地完成家庭責任之後就偷偷出來玩，背著屋企個女人出黎玩男人。呢個係現今社會既無奈現象，套戲真係講得到出黎！

好少電影咁正面講同性戀

另外，阿守真係好想讚呢套戲一樣野，就係佢用謝檸檬呢個靚佬做同性戀角色，佢外型似足一個正常男人，唔Cam唔姣唔變態，而且長情同深情，性格非常討好。

其實，大部份同性戀者根本就係咁樣！

希望之後既電視劇同電影，都唔好將同性戀者歸類為易服、人妖、變態個Ｄ，因為根本就唔係！男同志就只係鍾意男人，好簡單架咋！

講鴨講到一半半咁

最後，阿守一定要講呢套戲唔好睇既原因，就係描述得做鴨呢個職業唔夠深入，編劇好似冇做過Research咁，至少冇之前系列講做雞講到專家咁款。

其實做鴨同做雞差唔多，只不過男女身份調轉左之嘛，例如可以講下歷史，好似以前Ｄ人點做鴨，依家Ｄ人點做鴨等等，點樣登廣告搵客？點樣入行搵爸爸生？做鴨會做Ｄ乜？你估做健身教練同做甜品老師既鴨，真係畀人抽水咁簡單？唔洗上床？打個車輪都要掛？依家仲有大陸鴨、香港鴨、泰國鴨之爭呢？

就算唔講有敏感職業既鴨，好似警察鴨、消防鴨、明星鴨咁，都仲可以講飛鴨（空中少爺）、游水鴨（游水教練或救生員）、古惑鴨（紋身古惑仔）、魔術鴨等等，甚至可以組隊鴨鴨勁舞團，總之好多野玩。講真，阿守對住戲入面既外星鴨、粗口鴨、寶藥鴨，真係唔識笑囉！

總括黎講，《12金鴨》作為賀歲片係合格有餘，因為入面星光熠熠，而且睇得輕鬆又有笑位，嘻嘻哈哈就個半鐘。不過，比起之前睇完《金雞》系列個種共嗚感、代入感同埋職場秘聞既豐富度，真係差一大截。