[蘋果日報] 清熱酷男：筋肉 Him 引同志偷窺

身高逾 6 呎的男模黃嘉謙（Him），近日加盟王維基旗下的城巿電訊，在新劇《驚異世紀》跟梁小冰演夫婦，二人外形有點老妻少夫味道，Him 即抵死說：「我個妝要化老啲，小冰都好後生，咁咪襯番。」

健身回春

Him 雖已 39 歲，但樣貌較真實年齡年輕，不老之謎是狂做 gym。筋肉Him自爆經常在健身室迷倒同性戀者，他說：「佢哋眼光似強姦同非禮我，同佢哋眼神接觸，我真係唔可以當唔知。我仲試過做完健身去冲凉，沖沖吓發現有人擒高(目及)我，於是我一邊披毛巾，一邊衝去捉佢。」

Him 自此留下陰影，每次健身完必回家才沖凉，他表示寧惹緋聞也抗拒傳斷背，他說：「我好直。」

問 Him 滿意身形嗎？他說：「我仲未練好 6 嚿腹肌，練肌肉要食得好清，少少肥膩都唔得，咁樣好辛苦，又唔可以同朋友食飯，會好寂寞。」Him 雖然小心飲食，控制食量，但有時都忍不到口，他說：「我容許自己半年食一次東坡肉同梅菜扣肉。」

採訪：比華利

Profile

姓名：黃嘉謙（Him）
胸肌：42吋
身高：6呎2吋
嗜好：烹飪、聽歌、閱讀和健身等。
出道：6年前由美國來港進軍模界，曾拍滙豐銀行、中國移動和生力啤等廣告。08年參演亞視劇《法網群英》，近日跳槽城巿電訊，參演新劇《驚異世紀》。

召喚經典男神：古天樂黑實型男

雖然古天樂不算大隻仔，不過自從他曬黑皮膚，男人味立即飆升，由唇紅齒白的小生，轉型至古銅色型男極之成功，相信都冇乜機會看到他再白番。近年古仔在影圈甚吃得開，年年都有幾套電影上畫，入行以來他與緋聞絕緣，唯一承認的女友是黃瑩，近年他忙到甩晒轆，經常表示冇時間拍拖，看來 fans 要等他成家立室仲有排等。

撰文：玉兄