Poppers，再見！

一年前，阿守曾經有想過寫一系列有 Poppers 用法的文章，亦都有不少讀者來信叫阿守講 Poppers。

之不過，在那時阿守知道 Poppers 係已經出事，可能係唔合法，才沒有付諸實行，以免被警方認為阿守在鼓吹吸毒。

如果有睇今日《蘋果日報》同埋《爽報》，應該都知道 Poppers 現已正式被當成違法的東西，關鍵就是在成份，而且仲有人被定罪。

有索開 Poppers 的用家，都咪話唔驚！

而《蘋果日報》講的 3 月和 4 月的案件，阿守跟案中的被告 F 君和 G 君都有少少交情，因為佢地兩個都係賣 Poppers 的，阿守同佢地買開有感情，佢地上庭時亦都親身去旁聽，來龍去脈大約都知一二。

一年前已經畀人篤

首先，F 君在上年還在售賣 Poppers，某天出門就突然被一群警察截住，出事了！原來呢班係「反毒組」，話早前收到告密信，以為 F 君販賣毒品，因此警察花了一些時間將 F 君起底，然後趁佢出門時就拉佢返警處，之後仲帶返家中，搜出超大量 Poppers。

之不過，一粒毒粉都搵唔到。

當時警察就知道「奶」晒野，向 F 君呻：「你知唔知係邊個篤你出黎？佢害到我地做多好多野，呢Ｄ一睇就知道唔係勁野，亦都唔係我地要個Ｄ，最多咪罰錢！但我地 Report 都唔知點寫，真係大劑！」

由於警察係需要逐支 Poppers 拎去化驗，令到Ｄ警察搞好Ｘ耐，又要 Label 又要查指紋，一整個下來搞了足足幾個月。唔怪得之連警察都覺得食詐糊！而 F 君亦都真係唔知乜野人篤佢出黎，佢想答都答唔到。

原來 F 君和另一個被告 G 君出事後，呢位人兄即改名叫「唯一代理」，《蘋果日報》爆大獲後即龜縮。

「毒藥」變「毒品」

到進入司法程序，第一審時，警察方面的律師勁搞笑，話「Poppers 係毒藥，會食死人」，法官話「Poppers 係用黎索，唔係食，呢個唔成理由。依家要睇既，係 Poppers 對社會帶來乜野影響，呢Ｄ先叫毒品」。

當時，警察的律師被問到口啞啞答唔到，因為之前根本就冇案例參考，外國Ｄ案例更唔可以代表香港情況，因此法官就叫警察搵多Ｄ料先，冇料既就判無罪。到呢度阿守以為冇事，雨過天清。

點知到第二審時，警察突然找到一批 Poppers 化學成份的證物，證明 Poppers 含有第一類危險毒藥，亦係中樞神經迷幻劑之一，對社會造成不良影響，因此，Poppers 就被定性為毒品之一，亦都係咁，F 君和 G 君就被判監兩個月及緩刑兩年，同期執行。

冇事執返身彩

雖然法庭講係毒品，但判決紀錄卻是毒藥（23/5更新），F 君本來想上訴，話唔應該判監。不過律師就勸佢，「無論係毒品定係毒藥，冇得賴，上訴都註定輸，你真係犯咗法。同埋，你依家仲可以出返黎，唔洗坐監，已經執返身彩，你仲想點？」

呢句又係真，任何人扯上「毒」，至少都要入荔枝角，依家 F 君連一晚羈留所都唔洗，真係大命！

本來，呢件事就咁不了了之。點知過左一個月，呢件事就被《蘋果日報》爆左出黎，全城哄動。

唉！相信 Poppers 冇得再好似以前咁，可以明目張膽玩了！



《蘋果日報》

一索即 high增性慾　壞腦損心臟
毒品 Poppers港無監管警方當香薰

吹噓可增強性慾、外國早已列為毒品的「 Poppers」在港興起。《蘋果》記者在市面輕易買到，有人在夜店兜售，甚至有人大搞 Poppers性愛派對。不過，後知後覺的政府未把 Poppers列為毒品，多數青少年不知其毒害，更有警察搜到「都唔知係乜」。

記者：梁御和

俗稱 Poppers的亞硝酸烷酯（ alkyl nitrites）一類有機化合物，屬於興奮劑，日常會使用於空氣清新劑和錄像鏡頭清洗劑。近年本港興起一陣「 Poppers」熱潮，包裝類似普通香薰油，聲稱「索一索」即可達致快感、增加性慾，並放鬆陰道及肛門括約肌，大受男同性戀者歡迎。


旺角性商店有售

有夜蒲青年指出，近年 Poppers在夜店甚普遍，曾在夜店飲酒時有人主動遞上請他試吸，「佢哋話香港可以合法用，好多性商品店都有賣，我吸完之後個頭好暈，成身發熱同埋有性興奮」。

記者到旺角的性商品店放蛇，查詢後店主從櫃枱下拿出一支 Poppers，售價250元。閒談間他坦言開業十多年來都有賣，以往更曾公開放上架出售，只是近期「查得好勁」才低調販賣。

記者將所購得的 Poppers向衞生署查詢，證實其成份亞硝酸異戊酯（ amyl nitrite）屬於《藥劑業及毒藥條例》管制藥物，需在註冊藥房，經註冊藥劑師監督才可合法售賣；但現時香港沒有註冊藥物含有該成份。亞硝酸異戊酯可引致頭痛、心跳、頭暈或影響視力，過量服用更可致呼吸困難、抽搐及昏迷。

不少網上商店如淘寶等都有售賣 Poppers，更形容為「同志 gay用品」、「芳香劑」、「爆菊男女調情香水」等，每樽售價由35元至179元不等。關注高危性行為的再思社區健康組織總幹事何碧玉表示，近年越來越多年輕人開始吸食 Poppers，「多咗好多人用，又越來越多購買途徑，喺大陸夜場隨時可以買到，平則三四十蚊，貴則三四百蚊」。


加入香味包裝潮

她補充， Poppers會令人上癮，也有機會破壞腦神經及心臟功能，外國已被列作毒品，香港卻未有相應措施監管，「好多人都唔知 Poppers係毒品，試過有人畀警察搜到，警察都唔知係乜嘢，以為係一般香薰」。

她又指，廠商會為 Poppers加入不同香味，吹噓提高性興奮及放鬆肛門等功效，也陸續有人私下舉辦以不同 Poppers為主題的派對，配合「又 in又潮」的包裝紙，令年輕人毫無警覺下使用，情況令人擔心。

警方表示未有備存涉及 Poppers的舉報數字。本年3月及4月分別有兩人因管有 Poppers被檢控，根據《藥劑業及毒藥條例》分別被判監兩個月及監禁兩個月緩刑兩年。



學者狠批
管制新毒品　政府太慢太 out


英法早禁進口銷售

 「當年 K仔原本都係麻醉劑藥物，之後因為被廣泛濫用，政府至急急修例列為毒品。」城市大學犯罪學副教授黃成榮指出：「 Poppers早已被外國列為毒品，香港仲未有嚴格監管，當局做得太慢。」

Poppers早於80年代在西方國家的狂歡派對中流行，1990年美國及法國等多個國家宣佈禁止其作為吸劑進口、銷售及使用。

黃成榮認為當局應與前線社工緊密溝通，一發現問題即全面檢視。現時要把新興毒品列入《危險藥物條例》管制範圍，須先由禁毒處禁毒常務委員會討論，考慮藥物被濫用數量、普遍性及價錢等後拍扳，再交政府修例、立會通過。根據《危險藥物條例》，管有或吸食危險藥物，最高可判罰款100萬元及入獄七年，高於《藥劑業及毒藥條例》的最高罰則10萬元及入獄兩年。



不宜亂服
判斷力減　易致不安全性行為

增感染愛滋風險

 心臟科專科醫生黃品立指， Poppers內含的亞硝酸異戊酯，吸用及服食後，可令人血管擴張，也會令肌肉放鬆，曾被用作治療心絞痛等症狀。

「不過（ Poppers）同時會令大量血液湧入腦部，令腦壓上升，出現頭痛同暈眩現象。血液亦會較易流入性器官，令人有性興奮同勃起感覺。」但他警告，錯誤使用可以致命，尤其患有血壓過低、心臟病及血液科疾病的人士不應使用。

此外，臨床醫生相信索 Poppers後可影響判斷能力，引致不安全性行為，增加感染性病或愛滋病的可能性，部份吸用者表示吸用後明顯影響情緒。